Romana Helîm Yûsiv Bû Sedema vebûna Facebooka kurdî

June 29, 2021

www.amidakurd.com – 25.12.2008

Her tiştî ji romana Helîm Yûsiv dest pê kir. Niha 700 kurd di Facebookê de doza yek tiştî dikin, “Em Facebook Bi Kurdî Dixwazin!”.

Facebook a KurdîKom berî niha bi heftiyekê di Facebookê de vebû.

Di peyama yekem de jî sedemê vebûna komê hate nivîsandin. Sedem tiştekî balkêş bû.

Li gor agahiyan ji hemû cîhanê 1.000.000 kurd di Facebookê de endam in. Bi sedan komên wan hene. Lê endamekî Facebookê Rêzan Tovjîn ku nû bûye endam, dibîne ku taybetiyeke balkêş di Facebookê de heye. Li gor vê taybetiyê kesek bixwaze dikare kirrîn û firotinê jî li ser Facebookê bike. Tovjîn jî dibêje “bila di nav evqas alavan de tiştekî kurdî jî hebe” û romana Helîm Yûsiv a bi navê “Gava Masî Tî Dibin” di beşa firotinê de bi cih dike. Roman digel wêne, biha, agahiyên weşanxaneyê di nav pirtûkên firotinê de cih digire. Lê piştî 10 deqeyan peyamek ji Tovjîn re tê şandin. Li gor vê peyamê endamên tirk gilî li Facebook kirine û Facebookê jî pirtûka kurdî ji beşa firotinan rakiriye.

Beşa firotinê ya Facebook li gor her zimanekî cuda ye. Li gor vê yekê di tora tirkan de ji 2 milyonan zêdetir endam hene, ku di wir de kirrîn û firotinê dikin. Ji vê jî tê famkirin ku helwesta qedexeyê ne ji navenda Facebook e, lê ev helwesta Facebook a tirkî ye, ango servîsa tirkî wisa kiriye. Tovjîn li şûna ku bide pey vê û tirkan gilî bike, heman saetê di Facebook de “Koma Em Bi Kurdî Facebook Dixwazin” ava dikin. Di heftiyekê de 700 kes bûn endamê komê û niha gelek rêveberên wê jî hene.

Kom niha daxwaznameya îngilîzî amade dike ku ji navenda Facebookê re bişîne û vê armanca xwe bi wê bide qebûlkirin.

Daxwaznameya ku kom li ser nîqaşê dike jî wiha ye:

“Rêveberên Rêzdar ên Facebookê,

Em kurd li cîhanê bi qasî 40 milyonî ne. Welatê me di navbera Îran, Iraq, Sûriye û Tirkiyeyê de hatiye parvekirin. Li Iraqê Herêmeke Federal a bi navê Kurdistan heye ku xwedî parlamento ye û zimanê fermî kurdî ye. Herwiha zimanê kurdî li Iraqê zimanê fermî yê duyem e. Li Îranê jî Eyaleta Kurdistan heye û kurdî ji alîyê bi milyonan kurdan ve tê bikaranîn. Li Ermenîstanê kurdî zimanê duyem e ku li dibistanan tê fêrkirin. Kurd li gelek welatên cîhanê belav bûne û li gelek welatên biyanî mîna Swêd, Rûsya, Elmanya, Fransa, Belçîka, Norwêc, Danîmarka, Kazakistan, Emerîka hwd. Li van dewletan kurdî li dibistanan tê fêrkirin.

Em facebooka kurdî dixwazin ji ber ku dema kurd bixwazin Facebookê bi kar bînin bi gelek pirsgirêkan re rû bi rû dimînin. Mînak gelek kurd ji zimanên biyanî fam nakin û nikarin facebookê baş bi kar bînin. Lê mixabin kesên ji neteweyên serdest wekî Tirkiyeyê, naxwazin kurd di Facebookê de bi kurdî koman vekin, berheman biweşînin û bi kurdî binivîsin. Jixwe li Tirkiyeyê 20 milyon kurd hîn jî mafê perwerdeya bi kurdî bi dest nexistine. Mînak; di beşa tirkî ya Facebookê de zehmetî ji kurdên Tirkiyeyê tê derxistin. Li Tirkiye digel ku 20 milyon kurd hene jî, dema di Facebookê de berhemên kurdî têne bikaranîn ji aliyê rêvebirên tirk ve tên qedexe kirin. Divê kurd jî mîna hemû gelan xwedî mafê bikaranîna Facebookê bin. Em karin gelek mînakan wekî van bidin lê em bawer in ewqas têrê dike, ku hûn Rêvebirên Facebookê ên rêzdar ji pirsgirêka me kurdan haydar bibin.

Ji bo vê yekê me komek bi navê ”Em Facebook Bi Kurdî Dixwazin” ava kiriye. Em dixwazin bingeha ziman a Facebookê wergerînin kurdî û beşa kurdî ya Facebook bi rê ve bibin.

Em hêvîdar in ku hûn bi hestiyarî nêzîk bibin û daxwaza me qebûl bikin. Li gor texmîna me 1 milyon kurd endamê Facebook in. Heke daxwaznameya me were qebûlkirin em ê gelekî kêfxweş bibin û Facebook jî dê mezintir bibe.”

Romana Helîm Yûsiv Bû Sedema vebûna Facebooka kurdî

related posts

Halim Youssef tê bajarê Dresden: Ji romana xwe “99 morîkên belavbûyî” dixwîne.

Rojeke xweş li bajarê Giessen ê Almanyayê: Danasîna çapa almanî ya “99 morîkên belavbûyî”

Hannover – Stadtbibliothek: rojeke wêjeyî ya Halim Youssef ligel Dr.Herbert Schmastieg û Tengezarê Marînî